ENGLISH 
FRENCH 
ARAB ប្រេសិតពិសេសរបស់ប្រធានអាស៊ាន គ្រោងនឹងរៀបចំកិច្ចប្រជុំពិគ្រោះយោបល់នៅចុងខែមេសា ដើម្បីស្តាប់ទស្សនៈពីបណ្តាភាគីពាក់ព័ន្ធនានា និងផ្លាស់ប្តូរមតិយោបល់ អំពីការផ្តល់ជំនួយមនុស្សធម៌ប្រកបដោយប្រសិទ្ធភាព
AKP ភ្នំពេញ ថ្ងៃទី២៤ខែមីនា ឆ្នាំ២០២២ -- «សកម្មភាពបន្ទាន់នាពេលខាងមុខគឺ យើងគ្រោងរៀបចំកិច្ចប្រជុំពិគ្រោះយោបល់ នៅចុងខែមេសាដើម្បីស្តាប់ទស្សនៈពីបណ្តាភាគីពាក់ព័ន្ធនានា និងផ្លាស់ប្តូរមតិយោបល់អំពីការផ្តល់ជំនួយមនុស្សធម៌ប្រកបដោយប្រសិទ្ធភាព ទៅដល់អ្នកដែលត្រូវការបំផុត ដោយគ្មានការរើសអើង។ក្នុងកិច្ចប្រជុំពិគ្រោះយោបល់នេះ គឺយើងនឹងត្រូវពិភាក្សាគ្នារកដំណោះស្រាយដើម្បីសម្រួលឱ្យការចែកចាយជំនួយមនុស្សធម៌នេះ គ្មានឧបសគ្គអ្វីតទៅមុខទៀត»។នេះជាការថ្លែងរបស់ ឯកឧត្តម ប្រាក់ សុខុន ឧបនាយករដ្ឋមន្រ្ដី រដ្ឋមន្រ្ដីក្រសួងការបរទេស និងសហប្រតិបត្តិការអន្ដរជាតិ និងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា នៅក្នុងសន្និសីទសារព័ត៌មាន កាលពីថ្ងៃទី២៣ខែមីនាឆ្នាំ២០២២ ជុំវិញដំណើរទស្សនកិច្ចការងារនៅប្រទេសមីយ៉ាន់ម៉ា នៅព្រលានយន្តហោះអន្តរជាតិភ្នំពេញ។
ឯកឧត្តម ឧបនាយករដ្ឋមន្រ្ដី បានថ្លែងបន្តថា ប្រេសិតពិសេសរបស់ប្រធានអាស៊ាននឹងបង្កើនការពិភាក្សាជាមួយក្រុមប្រឹក្សារដ្ឋបាលរដ្ឋ និងអ្នកពាក់ព័ន្ធលើសំណើចំនួនបីដែលខ្ញុំបានលើកឡើងគឺទី១ យន្តការTroika ទី២ មិត្តរបស់មីយ៉ាន់ម៉ា និង ទី៣ ការរៀបចំច្រករបៀងមនុស្សធម៌ ក៏ដូចជាបញ្ហាផ្សេងៗទៀត។ ឯកឧត្តម ឧបនាយករដ្ឋមន្រ្ដី បានថ្លែងបន្ថែមថា«ខ្ញុំសូមបញ្ជាក់សាជាថ្មីថា សំណើទាំងនេះមានគោលបំណងតែមួយគត់ គឺដើម្បីជួយមីយ៉ាន់ម៉ាពនឿនការអនុវត្តកិច្ចព្រមព្រៀងជាឯកច្ឆន្ទ៥ចំណុច និងចូលរួមឡើងវិញឱ្យបានពេញលេញជាមួយគ្រួសារអាស៊ាន។ស្របពេលគ្នានេះ យើងនឹងព្យាយាមកំណត់កាលបរិច្ឆេទ ខ្លឹមសារការងារ និងលទ្ធផលរំពឹងទុកនៃទស្សនកិច្ចលើកក្រោយទៀតរបស់ប្រេសិតពិសេស បន្ទាប់ពីយើងជម្រាបជូនពីលទ្ធផលនៃទស្សនកិច្ចនេះ ទៅកាន់ភាគីពាក់ព័ន្ធសំខាន់ៗ ហើយស្តាប់មតិត្រឡប់ និងអនុសាសន៍នានា សម្រាប់ទិសដៅអនាគត។ មានន័យថា ខ្ញុំនឹងរាយការណ៍ជូនសហសេវិកដែលជារដ្ឋមន្ត្រីការបរទេសអាស៊ានរបស់ខ្ញុំ អំពីលទ្ធផលនៃដំណើរទស្សនកិច្ចនេះ ហើយយើងអាចនឹងមានការពិគ្រោះយោបល់ជាមួយគ្នាព្រមទាំងស្តាប់អនុសាសន៍ ឬមតិយោបល់នានា សម្រាប់ធ្វើយ៉ាងណាឱ្យដំណើរទស្សនកិច្ចលើកក្រោយអាចទទួលបានភាពជឿនលឿនក្នុងការអនុវត្តកិច្ចព្រមព្រៀងជាឯកច្ឆន្ទ៥ចំណុចនេះ»។
ឯកឧត្តម ប្រាក់ សុខុន ឧបនាយករដ្ឋមន្រ្ដី រដ្ឋមន្រ្ដីការបរទេស និងសហប្រតិបត្តិការអន្ដរជាតិ និងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា បានថ្លែងសង្កត់ធ្ងន់ថា កម្ពុជាគ្មានផលប្រយោជន៍អ្វីនៅក្នុងកិច្ចខិតខំប្រឹងប្រែងដោះស្រាយបញ្ហាមីយ៉ាន់ម៉ានេះ ក្រៅពីចង់ជួយប្រជាជនមីយ៉ាន់ម៉ានោះទេ។ «យើងចង់ជួយប្រជាជនមីយ៉ាន់ម៉ាឱ្យចៀងផុតពីសោកនាដកម្មដែលកម្ពុជាយើងធ្លាប់ជួបប្រទះ តាមរយៈសង្គ្រាម ជម្លោះប្រដាប់អាវុធ និងអំពើប្រល័យពូជសាសន៍ជិត៣០ឆ្នាំ។ យើងពុំមានបានទទួលផលប្រយោជន៍នយោបាយ សេដ្ឋកិច្ច ឬយុទ្ធសាស្ត្រអ្វីពីដំណើការដោះស្រាយវិបត្តិនៅមីយ៉ាន់ម៉ានោះទេ។ យើងមានតែភាពស្មោះត្រង់ក្នុងការជួយជ្រោមជ្រែងបញ្ហានេះ ហើយយើងមានភាពស្មោះត្រង់ក្នុងការបំពេញអាណត្តិរបស់យើង។ អាណត្តិរបស់កម្ពុជាជាប្រធានអាស៊ាន និងអាណត្តិរបស់ខ្ញុំជាប្រេសិតពិសេស។ យើងត្រូវបំពេញការទទួលខុសត្រូវក្នុងអាណត្តិរបស់យើង»។
ទាក់ទងបញ្ហាជម្លោះនៅមីយ៉ាន់ម៉ា សម្តេចតេជោនាយករដ្ឋមន្ត្រី ហ៊ុន សែន ធ្លាប់បានលើកឡើងថា "យើងមិនអាចយកសង្គ្រាមមកបញ្ចប់សង្គ្រាមបានទេ ហើយកិច្ចសហប្រតិបត្តិការឈ្នះ-ឈ្នះ គឺជាដំណោះស្រាយតែមួយគត់ចំពោះវិបត្តិនេះ”។ ចំណុចនេះខ្ញុំក៏បានលើកជាមួយថ្នាក់ដឹកនាំរបស់មីយ៉ាន់ម៉ាផងដែរ។ ដូច្នេះ ភាគីទាំងអស់ត្រូវតែខិតខំប្រឹងប្រែង ដើម្បីពង្រីកនូវចំណុចរួមគ្នា និងកាត់បន្ថយភាពខុសគ្នា។សន្តិភាពយូរអង្វែងអាចសម្រេចបាន លុះត្រាតែមានបរិយាប័ន្ន មានន័យថា មានការចូលរួមពីគ្រប់ភាគីទាំងអស់មិនមែនតាមរយៈផាត់ចោលភាគីណាមួយនោះឡើយ ដែលនេះគឺជានិន្នាការដែលកំពុងកើតមាននាពេលបច្ចុប្បន្ននៅមីយ៉ាន់ម៉ា៕
ដោយ៖ គង់ សិរីរ័ត្ន, រូបថត៖ ក្រសួងការបរទេស និង សហប្រតិបត្តិការអន្ដរជាតិ
