ENGLISH 
FRENCH 
ARAB ពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តព្រះសីហនុ
AKP ព្រះសីហនុ ថ្ងៃទី២៣ ខែតុលាឆ្នាំ២០២១--ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ និង ឯកឧត្តម សូ ជុងហួរ ប្រធានស្តីទីក្រុមប្រឹក្សាខេត្តព្រះសីហនុ កាលពីថ្ងៃសុក្រ១រោចខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២២ខែតុលា ឆ្នាំ២០២១បាន អញ្ជើញជាអធិបតីពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តព្រះសីហនុ ដោយមានការចូលរួមពីលោកអភិបាលរងខេត្ត លោកនាយក នាយករងរដ្ឋបាលសាលាខេត្ត លោកអភិបាលក្រុង ស្រុក ប្រធានមន្ទីរ អង្គភាពពាក់ព័ន្ធក្នុងខេត្ត ។
អនុក្រិត្យ ស្តីពីការតែងតាំងមន្ត្រីរាជការរបស់រាជរដ្ឋាភិបាលលេខ ៤៧០អនក្រ. តត តែងតាំងលោក ឡុង ឌីម៉ង់ ឋានន្តរស័ក្តវរមន្ត្រីថ្នាក់លេខ២ ឱ្យចូលកាន់មុខតំណែងជាអភិបាលរងនៃគណៈអភិបាលខេត្តព្រះសីហនុ។
លោក ឡុង ឌីម៉ង់ អភិបាល នៃគណៈអភិបាលរងខេត្តថ្មី បានធ្វើការបេជ្ញាចិត្តក្នុងការបំពេញតួនាទីដូចខាងក្រោម៖១.ប្ដេជ្ញាចិត្តបន្តគោរពរដ្ឋធម្មនុញ្ញ និងរាជរដ្ឋាភិបាលចូលរួមអនុវត្តនូវគោលនយោបាយចតុកោណដំណាក់កាលទី៤ នីតិកាលទី៦ ដើម្បីកំណើនការងារសមធម៌ ខិតខំបំពេញភារកិច្ចបម្រើសេវាសាធារណៈជូនប្រជាពលរដ្ឋប្រកបដោយគុណភាព តម្លាភាព និងប្រសិទ្ធភាព។២.ប្ដេជ្ញាធ្វើជាសេនាធិការបម្រើជូនរដ្ឋ បាលខេត្ត និងប្រជាជន រក្សាសាមគ្គីភាព ឯកភាពផ្ទៃក្នុងប្រកបដោយឆន្ទៈតែមួយក្នុងស្មារតីទទួលខុសត្រូវ និងយកចិត្តទុកដាក់ការងារយ៉ាងហ្មត់ចត់ជាទីបំផុត។៣.ប្តេជ្ញាពង្រឹង និងពង្រីកកិច្ចសហការស្អិតល្មួតជាមួយកងកម្លាំងប្រដាប់អាវុធ បណ្តាមន្ទីរ-អង្គភាពជំនាញពាក់ព័ន្ធនានា ក្នុងខេត្ត ដើម្បីបម្រើប្រជាពលរដ្ឋសំដៅ កែប្រែ និងលើកស្ទួយជីវភាពរស់នៅសុខុមាលភាព សន្តិសុខ និងសុវត្ថិភាពជូនប្រជាពលរដ្ឋស្របតាមគោលនយោបាយភូមិ-ឃុំមានសុវត្ថិភាព ព្រមទាំងបង្កលក្ខណៈសម្បត្តិងាយស្រួលដល់ការប្រកបអាជីវកម្មនានា។៤.ប្តេជ្ញាផ្សព្វផ្សាយ និងការពារសមិទ្ធិផលរបស់រដ្ឋបាលខេត្ត ដល់ប្រជាពលរដ្ឋគ្រប់លំដាប់ថ្នាក់ឱ្យបានទូលំទូលាយ។
ឯកឧត្តម គួច ចំរើន អភិបាលខេត្តព្រះ សីហនុ បានសម្ដែងនូវការកោតសរសើរ និងវាយតម្លៃចំពោះលោក ឈិន សេងងួន អភិបាលរង នៃគណៈអភិបាលខេត្តព្រះសីហនុ ដែលត្រូវទៅកាន់មុខតំណែងជាអភិបាលរង នៃគណៈអភិបាលខេត្តកំពង់ឆ្នាំងដែលកន្លងមកលោកបានចូលរួមយ៉ាងសកម្មក្នុងការអនុវត្តតួនាទី ភារកិច្ចបានយ៉ាងត្រឹមត្រូវ ស្របតាមគោលការណ៍ច្បាប់ ព្រះរាជក្រឹត្យ អនុ ក្រឹត្យ និងលិខិតបទដ្ឋានគតិយុត្តជាធរមាន សម្រេចបានលទ្ធផលជាបន្តបន្ទាប់ ដោយមានការគោរពស្រឡាញ់ពីថ្នាក់ដឹកនាំមន្ត្រីរាជការក្រោមឱវាទ។ សូមចូលរួមអបអរលោក ឈិន សេងងួន ដែលត្រូវរាជរដ្ឋាភិបាលផ្តល់សេចក្តីទុក ចិត្តតែងតាំងជាអភិបាល រងនៃគណៈអភិបាលខេត្តកំពង់ឆ្នាំង តាមអនុក្រឹត្ យលេខ ៤៧១អនក្រ.តត ចុះថ្ងៃទី៤ ខែតុលា ឆ្នាំ២០២១ និងសម្ដែងការស្វាគមន៍អបអរសាទរចំពោះលោក ឡុង ឌីម៉ង់ ត្រូវបានរាជរដ្ឋាភិបាលផ្ដល់សេចក្តីទុកចិត្តតែងតាំងជាអភិបាលរង នៃគណៈអភិបាលខេត្តព្រះសីហនុ តាមអនុក្រឹត្យ លេខ ៤៧០អនក្រ.តត ចុះថ្ងៃទី៤ ខែតុលា ឆ្នាំ២០២១ ដើម្បីបន្តនិរន្តរភាពការងារជាមួយនឹងក្រុមប្រឹក្សាខេត្ត គណៈអភិបាលខេត្ត ក្នុងការបម្រើឧត្តមប្រយោជន៍ជាតិ មាតុភូមិ និងប្រជាពលរដ្ឋខេត្តព្រះសីហនុ ជាពិសេសការអភិវឌ្ឍន៍ខេត្តព្រះសីហនុឱ្យកាន់តែមានការរីកចម្រើនជាលំដាប់ដើម្បីសម្រេចតាមផែនការមេរបស់រាជរដ្ឋាភិបាល គឺដើម្បីអភិវឌ្ឍន៍ និងប្រែក្លាយខេត្តព្រះសីហនុជា "តំបន់សេដ្ឋកិច្ចពិសេសគំរូពហុបំណង"។ ខ្ញុំមានជំនឿជឿជាក់ថា លោក ឡុង ឌីម៉ង់ នឹងបន្តខិតខំអនុវត្តតាមតួនាទីភារកិច្ច និងយកបទពិសោធន៍ដ៏ល្អជាពិសេសទំ នាក់ទំនងកិច្ចការបរទេស ការទូត និងកិច្ចសហប្រតិបត្តិការអន្តរជាតិរបស់ខ្លួនស្របតាមរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តប្រកបដោយមនសិការវិជ្ជាជីវៈ ការទទួលខុសត្រូវខ្ពស់ មានតម្លាភាព គណនេយ្យភាព រួមសាមគ្គីគ្នាជាធ្លុងមួយ ដើម្បីសម្រេចបាននូវស្នាដៃធំៗបន្តទៀត ជាពិសេសត្រូវប្រកាន់ភ្ជាប់នូវអភិក្រមរបស់សម្ដេចអគ្គមហាសេនាបតី តេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា គឺ "ឆ្លុះកញ្ចក់ ងូតទឹក ដុះក្អែល ព្យាបាល និងវះកាត់" និងបាវចនាពីរគឺ "កែទម្រង់ខាងក្នុង និងបង្កើនមិត្តខាងក្រៅ" ៕ដោយ៖ ងូ សុមុនី
