លោក អ៊ី សុខឡេង ជួបសំណេះសំណាលជាមួយប្រជាការពារ និងបុគ្គិកអនាម័យក្រុងព្រះសីហនុ
AKP ព្រះសីហនុ ថ្ងៃទី២២ ខែមករា ឆ្នាំ២០២១ -- លោក អ៊ី សុខឡេង អភិបាលក្រុងព្រះសីហនុ ជួបសំណេះសំណាល ជាមួយ ប្រជាការពារ និងបុគ្គលិកអនាម័យក្រុងព្រះសីហនុ និងមានការចូលរួមពីសមាជិក ក្រុមប្រឹក្សា ក្រុង អភិបាលរងក្រុង នាយករដ្ឋបាលសាលាក្រុង និងសប្បុរសជននានា នៅសាលាក្រុង ព្រះសីហនុ នារសៀលថ្ងៃសុក្រ ៩កើត ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២២ ខែមករា ឆ្នាំ២០២១។
លោក អ៊ី សុខឡេង អភិបាលក្រុងព្រះសីហនុ បានកោតសរសើរ និងវាយតម្លៃ ចំពោះការខិតខំប្រឹងប្រែងបំពេញការងាររបស់បងប្អូនប្រជាការពារ និងបុគ្គលិកអនាម័យក្រុង ថ្វីត្បិតតែសំរាមនាពេលបច្ចុប្បន្នមានប្រមាណពី ៣៥០ ទៅ ៤០០តោនក្នុងមួយថ្ងៃ ខុសប្លែក កាលពីឆ្នាំ២០១៨-២០១៩ សំរាមមានរហូតពី ១,៥០០ ទៅ ១,៨០០តោនក្នុងមួយថ្ងៃ ក៏ប៉ុន្តែ បងប្អូនអនាម័យយើងខិតខំបំពេញ ការងារដោយការទទួលខុសត្រូវ។ រដ្ឋបាលក្រុង បានធ្វើការជួបជុំសំណេះសំណាលជាមួយប្រជាការពារ និងបុគ្គលិកអនាម័យក្រុង ក្នុងមួយឆ្នាំ មិនតិចជាង៥ដងទេ ម្យ៉ាងការជួបជុំសំណេះសំណាល ដើម្បីបង្កើនភាពស្និទ្ធស្នាល រវាងថ្នាក់ដឹក នាំក្រុង ជាមួយមន្ត្រីរាជការ ប្រជាការពារ និងបុគ្គលិកអនាម័យរបស់យើង ពិសេសឈ្វេងយល់អំពីសុខទុក្ខ និងបញ្ហាប្រឈមនានារបស់បងប្អូន។
លោក អ៊ី សុខឡេង បន្តថា ខោអាវទាំងនេះ គឺបានមកពីការចូលរួមបរិច្ចាគថវិកា របស់ លោកឧកញ៉ា លោក លោកស្រី ក្នុងខេត្តរបស់យើង ដើម្បីយកមកទិញសម្លៀកបំពាក់ ចែកជូនបងប្អូននាពេលនេះ ព្រមទាំងបានថ្លែងអំណរគុណ និងអរគុណ ចំពោះសប្បុរសជន ដែលបានចូលរួមជាមួយរដ្ឋបាលក្រុងជាបន្តបន្ទាប់ សង្ឃឹមនឹងជឿជាក់ថា លោកឧកញ៉ា លោក លោកស្រី និងបន្តគាំទ្រដល់រដ្ឋបាល ក្រុងយើងបន្តទៀត ដើម្បីចូលរួមលើកកម្ពស់ សោភណភាពបរិស្ថាន និងការអភិវឌ្ឍក្រុង ខេត្តយើងឱ្យមានការរីកចម្រើនបន្ថែមទៀត។
ក្នុងឱកាសនោះ លោកអភិបាលក្រុងព្រះសីហនុ ក៏បានផ្តល់លិខិតថ្លែងអំណរ គុណជូនចំពោះលោកឧកញ៉ា លោក លោកស្រី ដែលបានចូលរួមបរិច្ចាគថវិកា ទិញខោ អាវ ចែកជូនប្រជាការពារ និងបុគ្កលិកអនាម័យនាពេលនេះ។
សូមបញ្ជាក់ថា ប្រជាការពារចំនួន២៧នាក់ ក្នុងម្នាក់ៗទទួលបានខោ០១ និងអាវ០១ ដោយឡែកបុគ្គលិកអនាម័យក្រុងចំនួន២៨នាក់ ក្នុងម្នាក់ៗទទួលបានអាវ០២៕
ដោយ ងូ សុមុនី