AKP បន្ទាយមានជ័យថ្ងៃទី២១ ខែឧសភាឆ្នាំ២០២៦--ការគិតគូរ និងយកចិត្តទុកដាក់ខ្ពស់លើការស្តារសម្បទា ក៏ដូចជាការផ្តល់ឱកាសស្មើៗគ្នាក្នុងសង្គមជូនដល់ជនមានពិការភាព នៅតែជាអាទិភាពចម្បងរបស់រាជរដ្ឋាភិបាលកម្ពុជា។

ស្តែងចេញពីការប្តេជ្ញាចិត្តនេះ វគ្គសិក្ខាសាលាស្តីពី «បរិយាបន្នអប់រំជំនាញវិជ្ជាជីវៈសម្រាប់មន្ត្រីទទួលបន្ទុកអត្តសញ្ញាណកម្មពិការភាពនៅតាមរដ្ឋបាលឃុំ សង្កាត់»ត្រូវបានរៀបចំឡើង កាលពីព្រឹកថ្ងៃទី២១ ខែឧសភា ឆ្នាំ២០២៦ នេះ នៅសាលប្រជុំក្រុមប្រឹក្សាខេត្តបន្ទាយមានជ័យ។

      ពិធីនេះបានប្រព្រឹត្តទៅក្រោមអធិបតីភា ពឯកឧត្តម សន សុផលអគ្គនាយក នៃអគ្គនាយកដ្ឋានស្ដារសម្បទា នៃក្រសួងសង្គមកិច្ច អតីតយុទ្ធជន និងយុវនីតិស ម្បទា និង លោក លី សុវណ្ណារិទ្ធអភិបាលរងខេត្តបន្ទាយមានជ័យ ដែលជាតំណាងដ៏ខ្ពង់ខ្ពស់របស់ ឯកឧត្តម អ៊ុ រាត្រីអភិបាល នៃគណៈអភិបាលខេត្ត។

នៅក្នុងឱកាសដ៏មានអត្ថន័យនោះ ឯកឧត្តម សន សុផល បានថ្លែងសុន្ទរកថាបើកដោយបានលើកបង្ហាញយ៉ាងច្បាស់ៗអំពីការយកចិត្តទុកដាក់ខ្ពស់បំផុត របស់រាជរដ្ឋាភិបាលកម្ពុជា ជាពិសេសតាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងការគាំពារ និងលើកកម្ពស់សិទ្ធិ ក៏ដូចជាជីវភាពរបស់បងប្អូនមានពិការភាពនៅទូទាំងប្រទេស។
 ឯកឧត្តមបានគូសបញ្ជាក់ថាជនមានពិការភាពមិនមែនជាបន្ទុករបស់សង្គមនោះទេ ប្រសិនបើយើងរួមគ្នាផ្តល់ឱកាស ជួយពួកគេឱ្យទទួលបានការអប់រំ និងជំនាញវិជ្ជាជីវៈច្បាស់លាស់។ ក្រសួងសង្គមកិច្ច តែងតែឈរនៅជួរមុខក្នុងការបង្កើតយន្តការគាំទ្រ ធានាថាគ្មានជនពិការណាម្នាក់ត្រូវបានបោះបង់ចោល ឬរើសអើងឡើយ។

ការជ្រើសរើសយកមន្ត្រីទទួលបន្ទុកអត្តសញ្ញាណកម្មពិការភាពនៅតាមរដ្ឋបាលឃុំ សង្កាត់ មកទទួលការបណ្តុះ បណ្តាលនាពេលនេះ គឺជាជំហានយុទ្ធសាស្ត្រមួយដ៏ត្រឹមត្រូវ។ មន្ត្រីមូលដ្ឋានគឺជា «ស្ពានចម្លង» ដ៏សំខាន់បំផុតក្នុងការស្វែងរក ស្គាល់ និងវាយតម្លៃពីតម្រូវការជាក់ស្តែងរបស់បងប្អូន មានពិការភាព។

វគ្គសិក្ខាសាលានេះផ្តោតសំខាន់ទៅលើការយល់ដឹងពីបរិយាបន្ន ការបើកទូ លាយ និងបង្កលក្ខណៈងាយស្រួលឱ្យជនមានពិការភាពអាចចូលរៀនជំនាញវិជ្ជាជីវៈបានដូចពលរដ្ឋទូទៅ។ការធ្វើអត្តសញ្ញាណកម្មច្បាស់លាស់ដើម្បីធានាថាទិន្នន័យជនពិការភាពត្រូវបានធ្វើបច្ចុប្បន្នភាព និងទទួលបានការគាំពារចំគោលដៅ។

ការផ្សារភ្ជាប់ឱកាសជួយតម្រង់ទិសជនមានពិការភាពឱ្យទទួលបានការបណ្តុះបណ្តាលដែលទីផ្សារការងារកំពុងត្រូវការ។    

 ជាការឆ្លើយតប លោក លី សុវណ្ណារិទ្ធ អភិបាលរងខេត្តបន្ទាយមានជ័យ បានសម្តែងនូវការគាំទ្រយ៉ាងពេញទំហឹងចំពោះគំនិតផ្តួចផ្តើមនេះ។

លោកបានសង្កត់ធ្ងន់ថា រដ្ឋបាលខេត្តបន្ទាយមានជ័យ ក្រោមការដឹកនាំរបស់ ឯកឧត្តម អ៊ុ រាត្រី តែងតែផ្តល់អាទិភាពខ្ពស់ដល់ការងារសង្គមកិច្ច ជាពិសេសការបង្កើនឱកាសការងារ និងការអភិវឌ្ឍសមត្ថភាពជនមានពិការភាពក្នុងខេត្ត។
លោកអភិបាលរងខេត្ត ក៏បានជំរុញ និងលើកទឹកចិត្តដល់សិក្ខាកាមទាំងអស់ដែលជាមន្ត្រីឃុំ សង្កាត់ ត្រូវយកចិត្តទុកដាក់ក្រេបជញ្ជក់ចំណេះដឹងពីវគ្គសិក្ខាសាលានេះឱ្យបានខ្ពស់ ដើម្បីយកទៅអនុវត្តផ្ទាល់នៅក្នុងមូលដ្ឋានរបស់ខ្លួន ក្នុងការស្វែងរក និងជួយសង្គ្រោះបងប្អូនមានពិការភាពឱ្យមានវាសនាភ្លឺស្វាងតាមរយៈការអប់រំជំនាញ។      

វគ្គសិក្ខាសាលានៅខេត្តបន្ទាយមានជ័យនាថ្ងៃនេះ មិនត្រឹមតែជាការបំពេញការ ងារតាមតួនាទីនោះទេ ប៉ុន្តែវាគឺជាការបើកទំព័រថ្មីមួយទៀតក្នុងការផ្តល់ ដងសន្ទូច ឬអាវុធសេដ្ឋកិច្ច (ជំនាញវិជ្ជាជីវៈ) ជូនដល់ជនមានពិការភាព ដើម្បីឱ្យពួកគាត់អាចរស់នៅដោយមានកិត្តិយស ឯករាជ្យភាព ថែមទាំងអាចចូលរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចគ្រួសារ និងសង្គមជាតិទាំងមូលផងដែរ៕

ដោយ៖ឈុនសារ៉ាត