AKP ភ្នំពេញថ្ងៃទី ១១ ខែឧសភា ឆ្នាំ ២០២១​ - កាលពីថ្ងៃចន្ទ ប្រព័ន្ធផ្សព្វផ្សាយ TOLOnews បានរាយការណ៍ដោយដកស្រង់ពីប្រភពមន្រ្តីថា ការបំផ្ទុះគ្រាប់បែកនៅតាមដងផ្លូវមួយបានវាយប្រហាររថយន្តក្រុងដឹកអ្នកដំណើរមួយនៅក្នុងខេត្ត Pawan នៅភាគកណ្តាលនៃប្រទេសអាហ្គានីស្ថាន។

សារព័ត៌មាន TOLOnews បាននិយាយថា ការផ្ទុះនេះបានកើតឡើងនៅតំបន់ Pul-e-Matak នៃខេត្ត Parwan កាលពីព្រឹកថ្ងៃច័ន្ទ ដោយបានសម្លាប់ជនស៊ីវិល ២នាក់ និង ៩នាក់ផ្សេងទៀតរងរបួស។

ប្រភពព័ត៌មានក្នុងស្រុកមួយបានប្រាប់សារព័ត៌មាន Sputnik ថា គ្រាប់បែកនៅតាមដងផ្លូវមួយផ្សេងទៀតបានផ្ទុះឡើងនៅភាគខាងត្បូងនៃខេត្ត Zabul ដោយសំដៅទៅលើរថយន្តក្រុងដឹកអ្នកដំណើរមួយ។ ឧប្បត្តិហេតុនេះបានបណ្តាលឱ្យមនុស្សស្លាប់រាប់សិបនាក់។ យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា មនុស្ស ៤១នាក់ផ្សេងទៀតបានរងរបួស។

រហូតមកដល់ពេលនេះ នៅមិនទាន់មានក្រុមណាមួយរួមទាំងក្រុមតាលីបង់ផងនោះបានអះអាងទទួលខុសត្រូវចំពោះការវាយប្រហារនេះនៅឡើយទេ៕

(ប្រភព Sputnik បកប្រែដោយលោក យា ចិន្តាខន្តី)