AKP ភ្នំពេញថ្ងៃទី ១១ ខែឧសភា ឆ្នាំ ២០២១​ - រដ្ឋាភិបាលប្រទេសថៃបានបរិច្ចាគសាច់ប្រាក់ចំនួន ១២,៨លានបាត (ប្រមាណជាង ៤០០ ០០០ដុល្លារអាម៉េរិក) និងគ្រឿងផ្គត់ផ្គង់វេជ្ជសាស្ត្រដើម្បីជួយដល់ការប្រយុទ្ធប្រឆាំងនឹងជំងឺរាតត្បាតកូវីដ-១៩ របស់ប្រទេសឡាវ។

ការបរិច្ចាគលើកដំបូងដែលមានតម្លៃ ៤,៣លានបាតត្រូវបានផ្តល់ឱ្យដោយស្ថានទូតថៃប្រចាំនៅប្រទេសឡាវ ដោយរួមមានសាច់ប្រាក់ចំនួន ២លានបាត​គ្រែអ្នកជំងឺចំនួន ១៨០ គ្រឿងឧបករណ៍ការពារផ្ទាល់ខ្លួន (PPE) ចំនួន ២ ៣៧០ឈុត និងសម្ភារៈវេជ្ជសាស្រ្តផ្សេងៗទៀត។

ការដឹកជញ្ជូនទំនិញលើកទី ២ ដែលមានតម្លៃជាង ៨,៥លានបាតនឹងត្រូវចែកចាយនៅចុងខែនេះ។

លើសពីនេះទៀត ប្រទេសថៃនឹងផ្តល់ការពិគ្រោះយោបល់ផ្នែកសុខភាពសាធារណៈតាមប្រព័ន្ធអនឡាញដើម្បីពង្រឹងសមត្ថភាពធ្វើតេស្ត៍ជំងឺកូវីដ-១៩ និងកិច្ចសហការរវាងបុគ្គលិកពេទ្យថៃ និងឡាវ ជាពិសេសនៅតាមតំបន់ព្រំដែនថៃ - ឡាវដើម្បីជួយទប់ស្កាត់ការរីករាលដាលនៃជំងឺកូវីដ-១៩។

ជាមួយគ្នានេះដែរ សមាគមមិត្តភាពថៃ - ឡាវ និងសមាគមធុរកិច្ចថៃនៅក្នុងប្រទេសឡាវ បានផ្តល់ជូននូវរបាំងបិទមុខសរុបថវិកាចំនួន ៣លានបាត សម្លៀកបំពាក់ការពារ PPE និងសម្ភារៈផ្សេងៗទៀតតាមរយៈស្ថានទូតថៃនៅទីនោះ។

កាលពីថ្ងៃទី ១០ ខែឧសភា ប្រទេសថៃបានកត់ត្រាករណីឆ្លងថ្មីនៃជំងឺកូវីដ-១៩ ចំនួន ១ ២៣០នាក់ ដែលទាបជាងចំនួនសរុបថ្ងៃមុនដែលមានចំនួន ២ ១០១នាក់ ដែលនាំឱ្យចំនួនសរុបនៅក្នុងប្រទេសនេះមានដល់ ៨៥ ០០៥នាក់។

ចំនួនអ្នកស្លាប់នៅក្នុងប្រទេសថៃមាន ៤២១នាក់ ដោយមានអ្នកស្លាប់ថ្មីចំនួន ២២នាក់។

ប្រទេសថៃបានមើលឃើញនូវការកើនឡើងនៃចំនួនអ្នកឆ្លងក្នុងចំណោមបុគ្គលិកសុខាភិបាលនៅក្នុងរលកទី ៣ នៃការផ្ទុះឡើងជំងឺកូវីដ-១៩ ដែលកើតចេញពីអ្នកជំងឺដែលមិនបានជូនដំណឹងទៅមន្ទីរពេទ្យអំពីហានិភ័យរបស់ពួកគេក្នុងការឆ្លងជំងឺនេះ៕

(ប្រភព VNA បកប្រែដោយលោក យា ចិន្តាខន្តី)