AKP ភ្នំពេញ ថ្ងៃទី២៧ ខែមេសា ឆ្នាំ២០២១--លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រកាសច្រាន​ចោល​ការ​ផ្សព្វផ្សាយព័ត៌មានអំពីការកំណត់ផែនទី បែងចែក តំបន់ក្រហម​  លឿងទុំ និងតំបន់លឿង ក្នុង​ភូមិសាស្រ្ដរាជធានីភ្នំពេញ។ ការប្រកាសច្រានចោលរបស់អ្នកនាំពាក្យសាលារាជធានី​ភ្នំពេញនេះ បានធ្វើឡើងនៅយប់ថ្ងៃទី២៦ ខែមេសា ឆ្នាំ២០២១ បន្ទាប់ពីមានការមាន​ការ ផ្សព្វផ្សាយ និងចែក​ចាយនូវផែនទីមិនផ្លូវការដែលបានបែងចែកតំបន់ទាំងបី គឺតំបន់ពណ៌​ក្រហម ពណ៌លឿង និងលឿងទុំ ដែលឆ្លុះបញ្ចាំងពីភូមិសាស្រ្ដក្នុងរាជធានីភ្នំពេញ។

លោក ម៉េត មាសភក្តី បានលើកឡើងថា គិតត្រឹមយប់ថ្ងៃទី២៦ ខែមេសា ឆ្នាំ២០២១​នេះ រដ្ឋបាលរាជធានីភ្នំពេញមិនទាន់បានរៀបចំកំណត់ផែនទីស្តីពីការបែងចែកជា តំបន់​ក្រហម តំបន់លឿងទុំ និងតំបន់លឿង ជាផ្លូវការណាក្នុងការផ្សព្វផ្សាយជូនដល់​បងប្អូន​ប្រជាពលរដ្ឋក៏ដូចជាសាធារណជនទូទៅឱ្យបានជ្រាបក្នុងករណីនេះនៅឡើយនោះទេ។ លោក​បានបន្ដថា រដ្ឋបាលរាជធានីភ្នំពេញ ទើបតែបានកំណត់នូវតំបន់ក្រហម ដែលបាន​កំណត់តាមរយៈសេចក្ដីសម្រេចចំនួន៣ ហើយបន្ដអនុវត្ដន៍រហូតមកដល់ពេលនេះដែល​បាន​បញ្ជាក់អំពីតំបន់ក្រហមតែមួយគត់នៅក្នុងរាជធានីភ្នំពេញ។ លោកបញ្ជាក់បន្ថែមថា សេចក្តីសម្រេចរបស់រាជរដ្ឋាភិបាល ដែលទើបនឹងចេញ​នៅ​ថ្ងៃទី២៦ ខែមេសានេះ នឹងមាន​សុពលភាពចាប់ពីម៉ោងសូន្យ នាថ្ងៃទី២៩ ខែមេសា ឆ្នាំ២០២១តទៅ។

លោក ម៉េត មាសភក្តី បានអំពាវដល់បងប្អូនប្រជាពលរដ្ឋបញ្ឈប់នូវការផ្សព្វផ្សាយ និងចែកចាយផែនទីដែលមិនផ្លូវការដែលបញ្ជាក់អំពីការកំណត់តំបន់ក្រហម លឿង និង​តំបន់​លឿងទុំ ដែលមិនផ្លូវការ នាំឱ្យមាន​ការយល់ច្រលំដល់បងប្អូនប្រជាពលរដ្ឋ និង​សាធារណមតិទូទៅក្នុងរាជធានីភ្នំពេញ និងព្រះរាជាណាចក្រកម្ពុជាទាំងមូលផងដែរ។

  ​យោងតាមសេចក្ដីសម្រេចរបស់រាជរដ្ឋាភិបាលកម្ពុជា បានបន្ដបិទ​ខ្ទប់រាជធានី​ភ្នំពេញ និងក្រុងតាខ្មៅ នៃខេត្តកណ្តាល រយៈពេល១សប្តាហ៍បន្ថែមទៀត ដើម្បីទប់ស្កាត់​ការរីករាលដាលជំងឺកូវីដ១៩ រហូតដល់ថ្ងៃទី០៥ ខែឧសភា ឆ្នាំ២០២១ ព្រមទាំងបែង​ចែក​កំណត់ជា តំបន់ក្រហម តំបន់លឿងទុំ និង តំបន់លឿង៕

ដោយ សួស សំរិត