AKP ភ្នំពេញ ថ្ងៃទី១៧ ខែធ្នូ ឆ្នាំ២០១៨ -- ប្រធានគណៈកម្មាធិការប្រយុទ្ធប្រឆាំងផលិផលក្លែងក្លាយបានចាត់ទុកការសិក្សាស្រាវ​ជ្រាវ របស់ក្រុមនិស្សិតផ្នែកវេជ្ជសាស្រ្ដ និងឱថសសាស្រ្ដសម្រាប់ការពារ និងព្យាបាលជំងឺ ដោយគ្រូ ពេទ្យកម្ពុជាគឺបានចូលរួម​ចំណែក​យ៉ាងសំខាន់ក្នុងការស្ដារនូវជំនឿទុកចិត្ដរបស់​ប្រជាជនមក លើវិស័យសុខាភិបាលកម្ពុជាឡើងវិញ។

ក្នុងពិធីប្រគល់ពានរង្វាន់ជ័យលាភីគីណាល់លើកទី៦ឆ្នាំ២០១៨ កាលពីចុងសប្ដាហ៍ នេះ នៅវិទ្យាស្ថានបារាំងប្រចាំកម្ពុជា ឯកឧត្តម នាយឧត្តមសេនីយ៍ មៀច សុផាន់ណា រដ្ឋ លេខាធិការ ក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិផលក្លែងក្លាយ បានមានប្រសាសន៍ថា ការចូលរួមរបស់និស្សិតផ្នែកវេជ្ជសាស្រ្ដ និងឱសថសាស្រ្ដក្នុងការស្រាវ ជ្រាវផលិតផលឱថសសម្រាប់ព្យាបាលអ្នកជំងឺនេះ នឹងរួមចំណែកមួយយ៉ាងសំខាន់ចំពោះ ដំណើការអភិវឌ្ឍរីកចម្រើនក្នុងផ្នែកវេជ្ជសាស្រ្ដ ដើម្បីចូលរួមស្ដារនូវជំនឿទុកចិត្ដរបស់ប្រជា​ជនកម្ពុជាមកលើវិស័យសុខាភិបាលឱ្យកាន់តែល្អប្រសើរឡើងថែមទៀត។ ឯកឧត្តមក៏​បាន​ជំរុញឱ្យនិស្សិតជំនាន់ក្រោយ ត្រូវយកនូវចំណេះដឹង ជំនាញ ទេពកោសល្យ និងការច្នៃប្រឌិត​ដែលបានមកពីការស្រាវជ្រាវរកឃើញអ្វីដែលថ្មី មករួមគ្នាពង្រឹងកេរ្ដិ៍ឈ្មោះ និងលើកកម្ពស់​វិស័យសុខាភិបាលឡើងវិញ ជាពិសេសបង្កើនការផ្ដល់នូវទំនុកចិត្ដឱ្យប្រជាពលរដ្ឋចាត់ទុកថា គ្រូពេទ្យកម្ពុជាមានសមត្ថ ភាពគ្រប់គ្រាន់ក្នុងការព្យាបាលជំងឺ ដោយមិនចាំបាច់ចេញទៅព្យា​បាលនៅក្រៅប្រទេសនោះទេ។

ឯកឧត្តមបានបញ្ជាក់ថា ការសិក្សាស្រាវជ្រាវនេះគឺពិតជាផ្ដល់នូវសារៈសំខាន់ណាស់ ប្រទេស​ជាតិដែលរីកចម្រើនគឺត្រូវមានការខិតខំប្រឹងប្រែង និងការចំណាយធនធាន ថាមពល និងចិត្ដគំនិត​ក៏ដូចជាគោលនយោបាយ ដើម្បីគាំទ្រកិច្ចការងារស្រាវជ្រាវនេះ។  ទន្ទឹមនេះ ប្រទេសកម្ពុជា ត្រូវការ​ការ​​ស្រាវជ្រាវក៏ដូចជាការការពារកម្មសិទ្ធិបញ្ញា ដែលជាលទ្ធផលបាន​ពីការសិក្សាស្រាវជ្រាវរួចហើយ ដើម្បីរកឃើញនូវផលិតផល ហើយអាចយកទៅប្រើប្រាស់​បានទាល់តែត្រូវការមានអ្នកការពារ។

ឯកឧត្ដមបានបន្ថែមថា នេះគឺជាវេទិកាមួយដែល​គាំទ្រ និងជំរុញលើកទឹកចិត្ដដល់​យុវជន យុវនារីជានិស្សិតកំពុងសិក្សាជំនាញវេជ្ជសាស្រ្ដ និងឱសថសាស្រ្ដ ឱ្យបន្ដខិតខំប្រឹង​ប្រែង​បង្កើនសមត្ថ​ភាព​យល់ដឹងរបស់ខ្លួនឱ្យកាន់តែទូលំទូលាយបន្ថែមទៀត។

លោកឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាអគ្គនាយកសហ​គ្រាសផលិត​ឱសថប៉េប៉េអឹម បានឱ្យដឹងថា ពានរង្វាន់គីណាល់នេះ ត្រូវបានបង្កើតឡើង​ក្នុងឆ្នាំ ២០១៣ ក្នុងគោលបំណងលើកទឹកចិត្តដល់​និសិ្សតផ្នែក​សុខាភិបាលក្នុងប្រទេសកម្ពុជាឱ្យចាប់ អារម្មណ៍លើការ​សិក្សា​ស្រាវជ្រាវ ស្របទៅតាមបទដ្ឋានវិទ្យាសាស្រ្តអន្តរជាតិ ដើម្បីផ្ដល់ឱ្យ និសិ្សតមានសមត្ថភាព និងសក្តានុ​ពល​គ្រប់គ្រាន់ក្នុងការសិក្សា​មុខជំនាញវេជ្ជសាស្រ្ដ និងឱស ថសាស្រ្ដ និងរួមចំណែកក្នុងការអភិវឌ្ឍ ការ​សិក្សា ស្រាវជ្រាវបែបវិទ្យាសាស្រ្តក្នុងប្រទេស កម្ពុជា។ លោកឱសថបណ្ឌិតបានបន្ដថា បើកាលណាមាន​និស្សិត ចាប់អារម្មណ៍ច្រើនលើការ ងារស្រាវជ្រាវ និងច្នៃប្រឌិតកាន់តែច្រើនគឺនិស្សិតទាំងនោះនឹងកាន់ តែមានឱកាសពាំនាំយក ទៅផ្ដល់ឱ្យក្រុមគ្រួសារ និងប្រជាពលរដ្ឋនៅទូទាំងប្រទេស ដើម្បីទទួលបាននូវ​សេវា​ថែទាំ សុខភាពកាន់តែល្អប្រសើរ។

សូមបញ្ជាក់ថា ការប្រកួតពានរង្វាន់ជ័យលាភីគីណាល់លើកទី៦ឆ្នាំ២០១៨នេះ គឺមាន បេក្ខជន ចូលរួមចំនួន​២៦ក្រុម មកពីគ្រឹះស្ថាន​ឧត្តមសិក្សា​ចំនួន​៦ផ្សេងគ្នាចំនួន​ ២៦ ក្រុម រួមមាន សាកលវិទ្យាល័យវិទ្យាសាស្រ្តសុខាភិបាល សាកលវិទ្យាល័យពុទ្ធិសាស្រ្ត សាកល​វិទ្យាល័យអន្តរជាតិ សាកលវិទ្យាល័យន័រតុន សាលាបច្ចេកទេសថែទាំវេជ្ជសាស្រ្ត និង​វិទ្យា ស្ថាន​វិទ្យាសាស្រ្តសុខាភិបាលខេមរភូមិន្ទ ក្រោមប្រធានបទ“ឱសថសម្រាប់ជំងឺគ្រុនក្តៅ និង ការថែទាំ”។ ចំពោះក្រុមនិស្សិត​ទទួលបាន​ជ័យ លាភី​​លេខ​១ ទទួលបាន​ពាន​១ និង​ទឹកប្រាក់​៤​លាន​រៀល​, លេខ​២ ទទួល​បាន​ពាន​១ និង​ទឹកប្រាក់​២​លាន​រៀល និង​លេខ​៣ ទទួលបាន​ពាន​១ និង​ទឹកប្រាក់​១​លាន​២០​ម៉ឺន​រៀល៕

​ ដោយ អ៊ុន រិទ្ធី