AKP ភ្នំពេញ ថ្ងៃទី១៧ ខែធ្នូ ឆ្នាំ២០១៨ -- សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្រ្ដីក្រសួងការពារជាតិ បានអះអាង ថា វិមាន ឈ្នះ ឈ្នះ នឹងដាក់បង្ហាញស្នាដៃពិតនៃការកសាងជាតិ ចាប់ពីចំណុចសូន្យ របស់ កម្ពុជា ក្រោមការតស៊ូរបស់សម្តេចតេជោ ហ៊ុន សែន។

ថ្លែងក្នុងសន្និសីទសារព័ត៌មាន កាលពីព្រឹកថ្ងៃទី១៧ ខែធ្នូ ឆ្នាំ២០១៨ នៅវិមាន ឈ្នះ ឈ្នះ សម្តេចពិជ័យសេនា ទៀ បាញ់ បានមានប្រសាសន៍ថា ក្រោយពីដាក់សម្ពោធ​ឱ្យដំណើរ​ការវិមាន ឈ្នះ ឈ្នះ នឹងដាក់ស្នាដៃនៃការតស៊ូ របស់សម្តេចតេជោ ហ៊ុន សែន តាមរយៈ​គោល​​នយោបាយ ឈ្នះ ឈ្នះ រួមទាំងមានសាក្សីដែលធ្វើដំណើរជាមួយសម្តេចតេជោ ចាប់ពី ថ្ងៃទី២០ ខែមិថុនា ឆ្នាំ១៩៧៧ ដែលមានចំនួន៥រូប ប៉ុន្តែ២រូប បានពលិកម្មបាត់ហើយ។ សម្តេច​ពិជ័យសេនាបានបញ្ជាក់ថា “យើងមានសច្ចភាពពិត តាមដំណាក់ៗ រហូតដល់នយោ​បាយ ឈ្នះ ឈ្នះ ដែលយើងនឹងរំលេចនៅទីនេះ ហើយវិមាន ឈ្នះ ឈ្នះ នេះ នឹង ប្រមូល អត្ថន័យ​ទាំងអស់នូវសភាពទាំងឡាយដែលជាសច្ចភាពដែលកម្ពុជាយើងមាន ដើម្បីប្រមូល មកទុកកម្កល់នៅទីនេះ”។

សម្តេចពិជ័យសេនាបានលើកឡើងថា ការកម្កល់ភស្តុតាងនៅវិមានឈ្នះ ឈ្នះនេះ គឺ ដើម្បីចៀសវាងការបកស្រាយណាមួយសុខពីការពិតដែលបានកើតឡើង ហើយនេះគឺជា តឹក​តាងជាក់លាក់ពិតប្រាកដទាំងអស់ ទោះបីជាមិនបាន១០០ភាគរយ ក៏វាកៀក នឹង១០០ ភាគរយដែរ។ សម្តេចពិជ័យសេនាបានបន្ថែមថា “កន្លែងនេះវាមិនធំប៉ុន្មានទេ ប៉ុន្តែវាធំ​សម្រាប់អត្ថន័យនៃប្រវត្តិសាស្ត្រធំណាស់ ហើយខ្ញុំចាត់ទុកជាព្រទ្យសម្បត្តិដ៏មហា​សាលនៃ​ប្រវត្តិ​​សាស្ត្រសម្រាប់អ្នកជំនាន់ក្រោយៗទៀត ក្នុងការសិក្សា ដឹងពីរឿងរ៉ាវទាំងឡាយមកដល់​ពេលនេះ ថាមានអ្វីខ្លះ វាបានឆ្លង់កាត់មកដល់ពេលនេះគឺវាវែងឆ្ងាយណាស់”។

ជាមួយគ្នានេះដែរ ការដាក់កម្កល់តឹកតាងនៅវិមាន ឈ្នះ ឈ្នះនេះ គឺរួមមានទាំង​សៀវ ភៅ ដែលនិយាយពីវិមាន ឈ្នះ ឈ្នះ ក៏មានការឆ្លាក់ខ្លឹមសារមួយចំនួននៅលើកផ្ទាំងថ្មី ដើម្បីកុំ ឱ្យបាត់ភស្តុតាងនៃគុណតម្លៃនេះ។ សម្តេចពិជ័យសេនាក៏បានបន្ដទៀតថា តាមប្រសាសន៍ សម្តេចតេជោ ហ៊ុន សែន នា យករដ្ឋមន្ត្រីនៃព្រះរាជាណាចក្រកម្ពុជាគូសបញ្ជាក់ថា​នឹងធ្វើពិធី សម្ពោធវិមាន ឈ្នះ ឈ្នះនេះឱ្យមានលក្ខខណៈធំ រហូតដល់បីយប់ បី ថ្ងៃ ចាប់ពីថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០១៨។ ទន្ទឹមនេះ ការសម្ពោធវិមាន​ឈ្នះ​ឈ្នះ ក៏ចំថ្ងៃនៃការបញ្ចប់ សង្គ្រាមស៊ីវិល តាមរយៈនយោបាយ ឈ្នះ ឈ្នះ របស់រាជរដ្ឋាភិបាល គឺមានរយៈពេល២០ ឆ្នាំមកហើយ។ សម្តេចពិជ័យសេនាក៏បានលើកឡើងពីគុណតម្លៃនៃវិមាន ឈ្នះ ឈ្នះ ក្នុង គោលដៅគឺដើម្បីបង្ហាញពីការបញ្ចប់សង្គ្រាមយ៉ាងពេញលេញ ចាប់តាំងពីមុនមក ដែលនាំឱ្យ ជាតិមាតុភូមិមានការឯកភាពជាតិ ដែលមិនធ្លាប់មាននោះទេ៕

ដោយ ប៊ុនរិទ្ធ