រដ្ឋមន្ត្រីកសិកម្មផ្តល់អនុសាសន៍៧ចំណុចដល់ភាគីពាក់ព័ន្ធ សម្រាប់បន្តការអភិវឌ្ឍវិស័យស្រូវអង្ករ
AKP ភ្នំពេញថ្ងៃទី ៣០ មេសា ២០១២–
ឯកឧត្តម ច័ន្ទ សារុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានផ្តល់អនុសាសន៍៧ចំណុចដល់ភាគីពាព័ន្ធ ជាពិសេសបណ្តា ខេត្ត ក្រុងទាំង២៤ ត្រូវបន្តការអភិវឌ្ឍវិស័យស្រូវអង្ករឲ្យទទួលបានជោគជ័យថ្មីៗថែមទៀត។
ឯកឧត្តមរដ្ឋមន្ត្រីបានផ្តល់អនុសាសន៍នេះ នៅក្នុងឱកាសបើកវេទិកាស្រាវជ្រាវអំពីស្រូវ អង្ករនៅកម្ពុជា ក្រោមការឧបត្ថម្ភគាំទ្រ និងផ្តួច ផ្តើមរៀបចំដោយវិទ្យាស្ថានស្រាវជ្រាវដំណាំស្រូវអន្តរជាតិ អ៊ីរី នៅសណ្ឋាគារ ភ្នំពេញ ក្នុងរាជធានីភ្នំពេញ នៅថ្ងៃទី ៣០ ខែ មេសា ឆ្នាំ២០១២ សំដៅបង្កើតកម្មវិធីពិភាក្សារវាងអ្នក វិទ្យាសាស្ត្រ អ៊ីរីជាមួយអ្នកវិទ្យាសាស្ត្រជាតិ និងដៃគូអភិវឌ្ឍន៍ ព្រមទាំងភាគីពាក់ព័ន្ធក្នុងវិ ស័យស្រាវជ្រាវ និង អភិវឌ្ឍន៍ផលិតកម្មស្រូវអង្ករក្នុងប្រទេសកម្ពុជា កំណត់ឲ្យបាននូវបញ្ហាប្រឈមសំខាន់ៗ និងដំណោះស្រាយ រួម ដើម្បីពន្លឿនការអភិវឌ្ឍវិស័យនេះឲ្យកាន់តែល្អប្រសើរ។
ឯកឧត្តមរដ្ឋមន្ត្រីបានបញ្ជាក់ថា ទី១. ការស្រាវជ្រាវ និងការអភិវឌ្ឍជាកត្តាកំណត់នូវកំណើន មានការ ស្រាវជ្រាវ គឺមានការអភិវឌ្ឍ បើ គ្មានការស្រាវជ្រាវក៏គ្មានការអភិវឌ្ឍដែរ ដូចនេះចាំបាច់ត្រូវជំរុញការស្រាវជ្រាវ អភិវឌ្ឍបច្ចេកវិទ្យាកសិកម្មថ្មីៗជឿនលឿន មានលក្ខណៈសមស្របសម្រាប់លក្ខខណ្ឌប្រទេស អ្នកវិនិយោគ កសិកម្ម និងកសិករកម្ពុជា ជាពិសេសក្នុងបរិបទនៃការធានានូវសន្តិសុខស្បៀង និង ការប្រកួតប្រជែងស្រូវ អង្ករ ក្រោមឥទ្ធិពលនៃការប្រែប្រួលអាកាសធាតុក្នុងពេលបច្ចុប្បន្ន និងទៅអនាគត។
ការស្រាវជ្រាវទាំងនេះ ត្រូវផ្តោតឲ្យបានខ្លាំងទៅលើប្រធានបទសំខាន់ៗមានដូចជា (ក).បង្កើនពូជស្រូវដែលមានលក្ខណធន់ទ្រាំនឹង ទឹកជំនន់ ភាពរាំងស្ងួត ជាតិ ប្រៃ កំដៅសត្វល្អិតនិងជំងឺ មានគុណភាពអង្ករខ្ពស់មានអាយុកាលខ្លីជាង ១០០ថ្ងៃ និងមានសមត្ថភាពប្រើប្រាស់ទឹកនិងសារធាតុចញ្ចឹម ប្រកបដោយប្រសិទ្ធភាពស្របទៅតាមក្សេត្របរិស្ថាននីមួយៗ។ (ខ).ការគ្រប់គ្រងជីជាតិដី និងសារជាតិចញ្ចឹមរបស់ដំណាំប្រកបដោយ និរន្តរភាព សម្រាប់ ប្រព័ន្ធក្សេត្របរិស្ថានដំណាំស្រូវដែលមានសក្តានុពលជីជាតិដីប្រភេទពូជនិង របបទឹកខុសៗគ្នាដោយធ្វើយ៉ាងណា ឲ្យដីមានគុណភាពល្អ ហើយត្រូវឲ្យមានតុល្យភាពរវាងការផ្គត់ផ្គង់សារធាតុចិញ្ចឹម និងតម្រូវ ការ របស់ដំណាំ។
ឯកឧត្តមរដ្ឋមន្ត្រីបន្តថា ក្នុងបរិបទនៃប្រទេសកម្ពុជា យើងគួរពិចារណាផងដែរអំពីកត្តាដែលបណ្តាលឲ្យមានឱនភាពដី វិធានការកែលម្អ ការអភិរក្សគ្រប់គ្រង និងការប្រើប្រាស់ដីឲ្យបានសមស្របតាម បទដ្ឋានបច្ចេកទេស ដូចជា ការកំណត់អត្តសញ្ញាណកម្មដី និងចំណាត់ ថ្នាក់ដីកសិកម្មឲ្យសម ស្របតាម មុខដំណាំ ការរៀបចំដី និងការគ្រប់គ្រង ទឹកក្នុងស្រែជាដើម។ (គ). សិក្សាវាយតម្លៃ និងកែលម្អគ្រឿង យន្តនិងឧបករណ៍ដាំដុះតាមបែបប្រពៃណី ទៅរកការធ្វើយន្តូបនីយកម្មផលិតកម្មដំណាំស្រូវដែលជាកត្តាចម្បង សម្រាប់ដោះស្រាយ បញ្ហាកង្វះខាតកម្លាំងពលកម្ម ព្រមទាំងកាត់បន្ថយការបាត់បង់ និងបង្កើនគុណភាព អង្ករដើម្បីប្រកួតប្រជែងលើទីផ្សារ។
ទី២.ត្រូវជំរុញការផ្សព្វ ផ្សាយឲ្យ បានទទួលំទូលាយ តាមរយៈការបោះ ពុម្ពផ្សាយឯកសារគ្រប់ប្រភេទ ការផលិតភាពយន្តឯកសារ និង ការអប់រំបំពាក់បំប៉ន ។ ក្នុងន័យ នេះ គ្រប់អង្គភាពជំនាញទាំងអស់របស់ក្រសួងកសិកម្ម រុក្ខាប្រមាញ់ និងនេសាទ ត្រូវសហការគ្នាឲ្យ បាន ជិតស្និទ្ធ ចាប់ពី ថ្នាក់ជាតិដល់ ថ្នាក់ក្រោមជាតិប្រកបដោយស្មារតីទទួលខុសត្រូវខ្ពស់។ជាមួយនេះដែរ ត្រូវពង្រីកសកម្មភាព បណ្តុះបណ្តាលបច្ចេក ទេសដល់ កសិករ តាមគ្រប់រូបភាព ជាពិសេសសាលារៀនស្រែកសិករប្រពលវប្បកម្ម ដំណាំស្រូវ និងវិធានការ ចម្រុះគ្រប់គ្រងដំណាំ ដើម្បីទទួលបានចំ ណេះដឹងជំនាញ និងការអនុវត្តក្នុង ផលិតកម្ម ដំណាំស្រូវ។ ទី៣.ត្រូវជំរុញការលើកកម្ពស់ការ យល់ដឹងអំពី ពូជស្រូវសំ ខាន់ៗទាំង១០ពូជ ដែលរាជរដ្ឋាភិបាលបានសម្រេចឲ្យប្រើប្រាស់ដើម្បីជំរុញផលិតកម្មស្រូវ និងការនាំចេញ អង្ករ តាមរយៈការ បើកវគ្គបំប៉នផ្សព្វផ្សាយជូនដល់គ្រប់អ្នកពាក់ព័ន្ធ មានផ្សព្វផ្សាយបច្ចេកទេសកសិកម្មភ្នាក់ងារអង្គការក្រៅរដ្ឋាភិ បាល អ្នកប្រមូលទិញស្រូវរោងម៉ាស៊ីនកិន ស្រូវរហូតដល់កសិករ។ ជាមួយនេះ ត្រូវបង្កើតប្រព័ន្ធ ផលិតកម្មគ្រាប់ពូជ ស្រូវឲ្យបាន ច្បាស់លាស់ដើម្បីធានាថា អ្នកអនុវត្តផលិតកម្ម ជាពិសេសកសិករទទួល បាននូវគ្រាប់ពូជស្រូវដែលមានគុណភាពល្អ។
ទី៤. ត្រូវកំណត់ឲ្យបានច្បាស់លាស់នូវប្រព័ន្ធក្សេត្របរិស្ថាន ដំណាំស្រូវ ដែលមាននៅក្នុងខេត្តរបស់ខ្លួន រួចបញ្ជ្រាបចូលក្នុងផែនការអភិវឌ្ឍឃុំ សង្កាត់ ស្រុក ខណ្ឌ និងខេត្ត ក្រុង ជាមួយនឹងការ ជំរុញការដាំដុះពូជស្រូវទាំង១០ឲ្យបានខ្លាំងក្លា ដោយបំផុសកសិករ និងអ្នក ដាំដុះទាំងឡាយឲ្យអនុវត្តតាមបទដ្ឋានបច្ចេកទេស។
ជាការចាំបាច់ត្រូវរៀបចំឡើងវិញនូវផែនទីដំណាំស្រូវ ដើម្បីបង្ហាញឲ្យបានច្បាស់លាស់អំពីតំបន់ ដាំដុះស្រូវតាមរដូវនីមួយៗ ប្រភេទដី និងតំបន់មានប្រព័ន្ធស្រោច ស្រព សំដៅកំណត់ប្រតិទិនដាំដុះឲ្យបាន ត្រឹមត្រូវ និងការបញ្ចូលបច្ចេកវិទ្យាចំទិសដៅទៅតាមលក្ខណៈដី និងស្ថានភាពទីតាំងភូមិសាស្ត្រ ។ ទី៥.ត្រូវ ជំរុញការសិក្សាតាមដានខ្សែសង្វាក់ផលិតកម្មស្រូវតាំងពីកន្លែង ដាំដុះរហូតដល់រោងម៉ាស៊ីន កិនស្រូវវេចខ្ចប់ដើម្បីប្រមូលព័ត៌មានសំខាន់ៗ ឬប្រតិកម្មនានាដែលអាចកើតមាន ជាយថាហេតុ ពាក់ព័ន្ធនឹងផលិតកម្មស្រូវ ចាប់ពី ពេលមុន និងក្រោយពេលប្រមូលផលដោយលៃលក យ៉ាងណា ដើម្បីចាត់វិធានការឆ្លើយតប ឬដោះស្រាយឲ្យបានទាន់ពេលវេលា ។
ទន្ទឹមនឹងនេះត្រូវ បន្តបំផុសយ៉ាងសកម្ម ដល់កសិករឲ្យប្តូរនូវទស្សនពីការដាំស្រូវសម្រាប់តែចិញ្ចឹមឆ្នាំង មករកការដាំស្រូវជាលក្ខណពា ណិជ្ជកម្មវិញ ។ ទី៦.ដើម្បីសម្រេចបាននូវគោលដៅខាងលើនេះ ការពង្រឹងនិងពង្រីកកិច្ច សហប្រតិបត្តិការជាមួយដៃគូអភិវឌ្ឍន៍ស្ថា ប័នពាក់ព័ន្ធ គ្រឹះស្ថានបណ្តុះបណ្តាលកសិកម្ម និងអង្គការអន្តរ ជាតិនានាឲ្យកាន់តែជិតស្និទ្ធថែមទៀតជាការចាំបាច់បំផុត ដើម្បីសំដៅ ជំរុញការស្រាវជ្រាវអភិវឌ្ឍន៍ និងអនុវត្តបច្ចេកទេសផលិតកម្មដំណាំស្រូវប្រកបដោយប្រសិទ្ធភាព ជាពិសេសសម្រេចឲ្យបាននូវគោលនយោបាយ ជំរុញផលិតស្រូវ និងការនាំចេញអង្កររបស់រាជរដ្ឋាភិបាល ក៏ដូចជាលើកកំពស់ជីវភាពរស់នៅរបស់ប្រជា កសិករ និងកំ ណើនសេដ្ឋកិច្ចជាតិ ។ និងទី៧. ដើម្បីជំរុញការស្រាវជ្រាវនានាឲ្យកាន់តែមានប្រសិទ្ធភាព។ ឯកឧត្តមរដ្ឋមន្រ្តីក្រសួងកសិកម្មក៏បានសុំឲ្យវិទ្យាស្ថានស្រាវជ្រាវដំណាំស្រូវអន្តរជាតិអ៊ីរីបង្កើននូវ ការងារស្រាវជ្រាវបន្ថែមទៀត សំដៅអភិវឌ្ឍន៍មូលដ្ឋានចំណេះដឹងថ្មីៗសម្រាប់ ជួយគាំទ្រដល់ស្ថាប័នស្រាវ ជ្រាវ ជាតិនានា និងគាំទ្រដល់ការងារស្រាវជ្រាវបង្កើនផលិតភាពដំណាំស្រូវ និងប្រព័ន្ធកសិកម្មដែលមាន ដំណាំស្រូវជាមូលដ្ឋានបន្តទៀត៕ ដោយលោក ប៉ាល់ សុង
| Tweet |
|
|
|
 |
|
|
|
|||||
