សម្តេចនាយករដ្ឋមន្រ្តីអរគុណចំពោះអាជ្ញាធរមានសមត្ថកិច្ច ដែលបង្កលក្ខណៈឲ្យការបោះឆ្នោតព្រឹទ្ធសភាមានភាពរលូន
AKP ភ្នំពេញ ថ្ងៃទី៣១ ខែមករា ឆ្នាំ២០១២—
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានថ្លែង អំណរគុណនិងការកោតសរសើរចំពោះ អាជ្ញាធរ គ្រប់លំដាប់ថា្នក់និងកងកម្លាំង ប្រដាប់អាវុធដែលចូលរួមពាក់ ព័ន្ធក្នុងការការពារយុទ្ធនាការបោះឆ្នោតនិងការបោះឆ្នោតព្រឹទ្ធសភាកន្លងមក ដែល ប្រព្រឹត្តទៅដោយរលូន ហើយគ្មានអំពើហិង្សា គ្មានអ្វីកើតឡើងគួរឲ្យកត់សំគាល់។
សម្តេចតេជោនាយករដ្ឋមន្រ្តីបានថ្លែងដូច្នេះក្នុងពិធីសម្ពោធនិងបើកការដ្ឋានកំណាត់ផ្លូវជាតិលេខ ៧៦ នាព្រឹកទី៣១ មករា ២០១២ នៅក្រុងសែន មនោរម្យខេត្តមណ្ឌលគីរី ។ សម្តេចតេជោថ្លែងថាក្រៅពីទំនាស់ដីធ្លីនៅក្នុងតំបន់ស្រុកស្នួលគឺគ្មានអ្វីកើតឡើងគួរឲ្យកត់សំគាល់ទេ យុទ្ធនាការបោះឆ្នោតបានប្រព្រឹត្តទៅដោយស្រួល តាមរយៈការបង្កបរិយាកាស នយោបាយ អព្យាក្រិត្យ សម្រាប់បណ្តាគណបក្សដែលចូលរួមបោះឆ្នោត ហើយ ក៏សូមថ្លែងនូវការកោតសរសើរចំពោះគណបក្ស នយោបាយទាំងអស់ដែលចូលរួមក្នុងការបោះឆ្នោត ។ ទោះបីជាមានតែគណបក្សពីរតែប៉ុណ្ណោះ ដែលចូល រួមប្រកួតប្រជែង ក៏ប៉ុន្តែអង្គបោះឆ្នោតចេញមកពីគណបក្ស៤គឺ គណបក្សប្រជាជន គណបក្សសមរង្ស៊ី គណបក្សហ៊្វុនស៊ីនប៉ិច និង គណបក្ស នរោត្តមរណឫទ្ធិ ប៉ុន្តែគណបក្សដែលឈរឈ្មោះមានតែគណបក្សប្រជា ជន និងគណបក្សសមរង្ស៊ីតែប៉ុណ្ណោះ ប៉ុន្តែ គណបក្ស ហ៊្វុនស៊ីនប៉ិច និងគណបក្សនរោត្តមរណឫទ្ធិ ក៏បានចូល រួមបំពេញកាតព្វកិច្ចក្នុងឋានៈជាម្ចាស់ឆ្នោតម្នាក់ផងដែរ ។
សម្តេចតេជោបន្តថា ពិតមែន តែមាន អវត្តមានខ្លះ នៃអង្គបោះឆ្នោត ក៏ប៉ុន្តែក៏មានសមាជិក សមាជិកា នៃគណបក្សទាំងអស់បាន មកបោះឆ្នោត ទាន់ពេលវេលាភាគច្រើន ។ សូមថ្លែង អំណរគុណចំពោះបក្ស នយោបាយទាំងអស់ ដែលបានចូលរួមប្រកួតប្រជែងប្រកបដោយភាពថ្លៃថ្នូរ ពិតមែនតែមានការលើកយក បញ្ហានេះ ឬ បញ្ហានោះ ប៉ុន្តែមិនមែនជាបញ្ហាដែលជះឥទ្ធិពលទៅដល់បរិយាកាសនៃការបោះឆ្នោតដែល គួរឲ្យ ទុកចិត្តបាននោះទេ ហើយលទ្ធផលនេះឃើញថា បណ្តាបក្សនយោបាយមួយចំនួនក្នុងនោះគណបក្ស ប្រជាជនច្បាស់ជាទទួលយកហើយឮថា ដូចជាគណបក្សសមរង្ស៊ី ក៏ទទួលយកនូវលទ្ធផលនៃការបោះឆ្នោត ព្រោះគាត់អបអរសាទរដែរហើយ ។ ខ្ញុំក៏សូមអរគុណចំពោះសមាជិក សមាជិកាក្រុមប្រឹក្សាឃុំ សង្កាត់នៃ គណបក្សប្រជាជន តំណាងរាស្ត្រនៃគណបក្សប្រជាជនដែលបានចូលរួមបោះឆ្នោតជូនគណបក្សប្រជាជន ។
ក្រៅពីនោះក៏សូមថ្លែងអំណរគុណចំពោះសមាជិក សមាជិក សភានិងសមាជិក សមាជិកាក្រុមប្រឹក្សាឃុំ សង្កាត់ នៃគណបក្សហ៊្វុនស៊ីនប៉ិច គណបក្សនរោត្តមរណឫទ្ធិ គណបក្សសមរង្ស៊ី ដែលបានបោះឆ្នោតគាំទ្រ គណបក្សប្រជាជនផងដែរ ដែលគណបក្សប្រជាជនបានទទួលលើស សម្លេងរបស់ខ្លួនចំនួន ៧៩៧ សម្លេង លើចំនួនដែលខ្លួនមាន ។ នេះគ្រាន់តែជាព័ត៌មានក្រៅផ្លូវការទទួលបានពីគណៈកម្មាធិការជាតិបោះឆ្នោត មួយផ្នែក ហើយមួយផ្នែកទៀតតួរលេខផ្ទៃក្នុងរបស់គណបក្សប្រជាជន ព្រោះសម្លេងឆ្នោតគេគិតតាម គណបក្ស សម្លេងរបស់គណបក្សប្រជាជនមានត្រឹមតែ៨០៨៣សម្លេងទេ ដល់ពេលទៅបោះឆ្នោត បានកើន សម្លេងទៅដល់ ៨៨៨០សម្លេង ហើយចំនួនអាសនៈបានកើនឡើងមួយនៅខេត្តកំពង់ចាម ។ កាលពីអាណត្តិ ទីពីរមានតែ ៤៥អាសនៈទេ ឥឡូវបានកើនដល់ ៤៦អាសនៈ ។ សម្តេចតេជោបានបន្តថា ឆ្នាំនេះកម្ពុជាត្រូវចំណាយ ច្រើនណាស់ ដូចជាការប្រជុំអាស៊ាន និងចំណាយ សម្រាប់ការបោះឆ្នោតហើយឆ្នាំក្រោយត្រូវចំណាយច្រើនទៀត ប៉ុន្តែប្រទេសចិន ក៏បានជួយច្រើនដែរ សម្រាប់ ការរៀបចំកិច្ចប្រជុំកំពូលអាស៊ាន ៕
ដោយលោក ជឹម ណារី
| Tweet |
|
|
|
 |
|
|
|
|||||
