AKP ភ្នំពេញថ្ងៃទី ២៨ តុលា ២០១១—

ក្នុងជំនួបពិភាក្សាជាមួយឯកឧត្តមឧបនាយករដ្ឋមន្រ្តីសុខ អាន រដ្ឋមន្ត្រីទទួលបន្ទុកទីស្ដីការ គណៈ រដ្ឋមន្ត្រី​រសៀលថ្ងៃទី២៦ខែតុលាឆ្នាំ២០១១នៅទីស្ដីការគណៈរដ្ឋមន្ត្រីឯកឧត្តម ALEXANDER IGNATOV ឯកអគ្គរដ្ឋ ទូត​​នៃសហព័ន្ធរុស្ស៊ីប្រចាំនៅកម្ពុជា អមដំណើរដោយ លោកសាស្ត្រាចារ្យ ​VICTOR​​​ SUMSKIY និងប្រតិភូ មួយចំនួន បានជំរាបជូនថា​រុស្ស៊ីមានបំណងចង់ជួយជួសជុលប្រាសាទមួយនៅខេត្តសៀមរាប ដែលនេះជា ការរួមចំណែកជួយដល់ការអភិរក្ស និងអភិវឌ្ឍផ្នែកវប្បធ៌មរបស់កម្ពុជា។
 

ឯកឧត្តមឧបនាយករដ្ឋមន្ត្រី សុខ អាន បានលើកទឹកចិត្ត ព្រមទាំងបានជំរាបជូនអំពីគោលនយោ បាយ របស់ រាជរដ្ឋាភិបាលក្នុងការអភិរក្សជួសជុលឡើងវិញនូវប្រាសាទចាស់ៗ នៅខេត្តសៀមរាបក៏ដូចជា នៅ ខេត្ត មួយចំនួនទៀត ។ កម្ពុជាជាប្រទេសមានសក្ដានុពលខ្ពស់និងមានប្រាសាទ​បូរាណ​ច្រើនជាង​គេ នៅ លើពិភពលោក។ 

ប៉ុន្តែប្រាសាទបូរាណមួយចំនួនទទួលរងគ្រោះដោយគ្រោះធម្មជាតិ ។​ដូចនេះ​យើង​ត្រូវការជួសជុលឡើង វិញ ដើម្បីជាផ្នែកមួយរក្សានូវបេតិកភណ្ឌជាតិនិងទាក់ទាញភ្ញៀវទេសចរមកកាន់ កម្ពុជាបន្ថែមទៀត ។
 

ឯកឧត្តម សុខ អាន បន្តថា កម្ពុជាមានប្រាសាទជាង១០០០ដែលភាគច្រើននៅខេត្តសៀមរាប។​

ចំពោះប្រាសាទអង្គរវត្តដ៏ល្បីល្បាញត្រូវបានចុះក្នុងបញ្ជីបេតិកភណ្ឌពិភពលោកនៅឆ្នាំ១៩៩២ ។ ដោយ កម្ពុជាមាន​សក្ដានុពលខ្ពស់លើវិស័យវប្បធម៌ បេតិកភណ្ឌជាតិ និងពិភពលោកនោះទើបបានជានៅឆ្នាំ ១៩៩២ គណៈ​កម្មាធិការសម្របសម្រួលអន្តរជាតិ(ICC) ដែលមានសហប្រធាន​ ​គឺជប៉ុននិងបារាំងត្រូវបានបង្កើតឡើង​ដើម្បី ធ្វើការ​អំពាវ​នាវ​​ឲ្យ​ប្រទេសជាមិត្តរបស់កម្ពុជាឲ្យផ្ដល់់ជំនួយជួសជុល អភិរក្សប្រាសាទនានាដែលទទួល ការខូចខាត ។ ​​​បច្ចុប្បន្ន​មានប្រទេសចំនួន១៦បានចូលរួមក្នុងការ​អភិរក្ស និងមានគំរោងចំនួន៦០​គំរោង​ដែលបាន​និងកំពុងធ្វើនិងបន្តធ្វើចាប់តាំងពីឆ្នាំ១៩៩២រហូតមកដល់សព្វថ្ងៃ។

លោកសាស្ត្រាចារ្យ VICTOR SUMSKIY បានមានប្រសាសន៏ឯកភាពទៅលើទស្សនៈ និងការយល់​ឃើញ​របស់​ឯកឧត្តមឧបនាយករដ្ឋមន្ត្រី សុខ អាន ថា មានសារសំខាន់ណាស់ដែល​រុស្ស៊ី គួរតែ​ចូលរួមនៅ​ក្នុងការជួស ជុល ​និងអភិរក្សប្រាសាទណាមួយនៅខេត្តសៀមរាប។

ឯកឧត្តមឧបនាយករដ្ឋមន្ត្រី មានប្រសាសន៏ថា កន្លងមកនេះមានប្រទេសមួយចំនួន​​បានទទួល​យកការ​ជួសជុល​ និងអភិរក្សប្រាសាទមួយចំនួននៅខេត្តសៀមរាបនោះគឺប្រទេសបារាំង ជប៉ុន ឥណ្ឌា ស្វីស អ៊ីតាលី អាល្លឺម៉ង់ ហុងគ្រី ចិន អាមេរិក កូរ៉េខាងត្បូង . .។​ ដូច្នេះរុស្ស៊ីគួរតែ​ចូលរួម​ចំណែក​ក្នុងការ ជួយជួសជុល និងអភិរក្សប្រាសាទបូរាណនៅកម្ពុជា។

ឯកអគ្គរដ្ឋទូតរុស្ស៊ី មានប្រសាសន៏ថា នៅឆ្នាំ២០១២ ខាងមុខនេះដោយសារតែកម្ពុជាធ្វើ​ជាម្ចាស់ ផ្ទះ​នៃកិច្ច ប្រជុំកំពូលអាស៊ាន និងជាប្រធានអាស៊ាន នោះនឹងមានការផ្លាស់ប្ដូរថ្នាក់រដ្ឋមន្ត្រីរវាងទីក្រុងមូស្គូ និងទី ក្រុង ភ្នំពេញ ។ នៅក្នុងដំណើរទស្សនកិច្ចនាពេលនេះគណប្រតិភូនឹងទៅធ្វើទស្សនកិច្ចនៅ​ខេត្ត​សៀមរាប​ដើម្បី ពិនិត្យមើលថាតើប្រាសាទណាមួយដែលរុស្ស៊ីគូរជ្រើសរើសយកជួសជុល និងអភិរក្ស៕

ដោយលោក អ៊ុក សាផាន